Rom 16 | GAM | STEP | Nono abane Pibi ge, ye une wopake ye aune. Une dumo Senkria pillgi dji una moi al, kogo wopake yendo ana moro.

Romans 16

Pol una merke wopake we dje awi

1 Nono abane Pibi ge, ye une wopake ye aune. Une dumo Senkria pillgi dji una moi al, kogo wopake yendo ana moro. 2 Une wonda poke, ye Iwa Kerman kandjiye al dje i numog woro djembon to aune. Ge nono God unakye mormon singare yembon mal paro. Una merke mor al une wal awo awo yendo. Alla une na pille awi eri, une wal ta nayenda ge ye une aune.

3 Ana Prisila woge Akwila boll aike mormell ge, ye na kandjina al soka wopake we dje aune. Na Krais Jisas kogoye yell ge, soka na boll kogo aike yepill. 4 Una soka tambon yei ge soka napille, na pak to aupill. Alla na taimane pille naupill. Epil djell una pillgi djinj una merke moi al, soka ye wopake ye aupill pille, una wopake we dje soka awinj. 5 Una pillgi djinj una po soka numbine al makai to mor ge, ye wopake we dje ga aune.

Na ye noll una Epainetus ge, ye na kandjina al wopake we dje une aune. Propins Esia una Krais kandjiye pillgi nandji poke, iwa ge asamoll pillgi dji.

6 Ye ana Maria wopake we dje aune. Une ye pille pak kerman to awi. 7 Iwana Andronikus ne, Junias mormell ge, ye wopake we dje soka aune. Soka ge na agana abana mormell. Na kaye pall al soka aike papin. Aposel kambono soka pille pla ye awi mormell. Soka Jisas kandjiye asamoll pillgi djipill, na are pillgi djill. Ye soka wopake we dje aune. 8 Ye iwa Ampliatus wopake we dje aune. Iwa Kerman kandjiye al na une wopake kando. 9 Ye iwa Urbanus wopake we dje aune. Krais kogoye yenmon al ge une nono agane moro. Alla iwa Stakis moro ge na wopake kando, ye wopake we dje aune.

10 Ye iwa Apeles wopake we dje aune. Une moi al ege ke woi ba une Krais boll karkar kaima yei pille une kandjiye embe paro. Iwa Aristobulus unakye mor ge ye wopake we dje aune. 11 Ye iwa Erodion wopake we dje aune. No soka Juda una mormoll. Iwa Kerman wombaye kambono iwa Narsisus epilye mor ge, ye wopake we dje aune. 12 Ambe ambe soka Tripina ne, Triposa ye wopake we dje aune. Soka Iwa Kerman kogoye al yembe yenmell. Ana wopake Persis ge ye wopake we dje aune. Une Iwa Kerman kogoye al yembe yendo. 13 Iwa Kerman iwa Rupus dje i ge, ye wopake we dje aune. Alla yene me moro ge na mana moro mal embe moro, ye wopake we dje aune.

14 Iwa Asinkritus, Plegon, Ermes, Patrobas, Ermas, ne agane boll mor ge, ye wopake we dje aune. 15 Kambono Filologus ne, Julia ne, Nereus yene ambe boll mormell ne, Olimpas ne, God unakye kambono boll mor ge, ye wopake we dje aune. 16 Nono God unakye molo yenmon mal ge, ye yenekne djembon tane. Alla Krais pillgi djinj una dumo yemyem mor ge, ye Rom una wopake we dje awinj.

Una kandja kende kaima djine ye kanpol tane

17 Agana abana kambono ye mor ge! Na kandja dongall dje ye aundo. Kandja wopake ye asa pi ge, una pende ye mor al wo kandja gun ta djinj, ba ye kanpol tane. Ye God pille mop awo, nonga dje er djelldjell po djine, ye molo ellke worne! 18 Nono Iwa Kerman Krais yene kogoye pai mal ge, kambono embe nayenj. Yenekne pille kogo ye, kandja kende kaima dje, una napille mor ge nomane to ke ye awinj. 19 Ba kandja wopake pai ge, ye pille karkar yenj mal, una porapora pi pora dji pille, na wo pro ba, ye kanpol tane. Wal wopake paro ge, ye kanne ba wal ke paro ge ye nakanne dje na nomana embe mal paro. 20 Alla ege tuge ta mopin dal, God nono ellne tukne arngan ye aundo iwa ge yendaka, ye Satan kamblo kal woro kerne. Nono Iwa Kerman Jisas Krais wandill golo aundo me ge, ye boll panda.

Pol age une boll mor ge Rom una moi al wopake we dje awinj

21 Iwa Timoti na boll aike kogo yendo una ge, une ye pille wopake we dje aundo. Alla na agana Juda una mor ge, iwa Lusius, Jeson ne, Sosipater ga ye wopake we dje awinj. 22 Na Tertius moro ge, Pol kandja dje na awika, na pepa ge boll. Iwa Kerman kandjiye al na ye pille wopake we dje aundo. 23 Iwa Gaius ge ye wopake pille aundo. Une na dje i numog woro singare wopake ye, Jisas pillgi djinj una kantau wopake ye awo embe yendo. Iwa Erastus ge dumo mormon al une ku kantau ye moi una ne, nono agane Kwartus boll aike ye wopake pille aumell.

Nono God kandjiye amblo pla worbon

25 Kandja wopake na dje wando ge, God ye wordaka ye pillgi dongall djine. Kandja wopake paro ge Jisas Krais ye epil djell una ye aunda ge, kamasa kandja ge seke pai. 26 Ba ipon, God kandja dje pene wori pora dji. Propet kamasa pepa bolo pagi mal ne, God kam kanan moro iwa kandja dji mal ge, nono po una porapora dumo yemyem mor al kandja ge dje awo kerpin. Embe yepin ge una Krais kandjiye al pillgi dje, karkar yene ge kune yendo. 27 Alla Jisas Krais kogo yei al ge, God taimane nomane kerman pai una, yene kandjiye kerman eri pandambe. Kaima.